面對死亡的幽默感
我想，面對人生的苦難，真的需要有一些幽默感。
原文出自陳榆blog
有次睇電視，某劇集講有個退休輔導員收到電話，然後有下面的回應：
“Hello?”
“He is not here, please don’t call back,”
“because he is dead, he died a year ago…”
跟著，她滿眼通紅繼續望著電腦發呆…
我睇到呢度就想起將來我老婆會唔會同樣面對呢D電話，因為總有機會有朋友唔知我死咗，總有機會D “sales”如安信兄弟會打嚟揾我，總有機會D乜乜市場調查會打嚟話阻你幾分鐘，亦總有機會某教會以為你未死又請你講道。
如果你係我老婆，你會點答？
我寫呢篇blog嘅時候，老婆正高牀軟枕，無機會問佢。望住佢個樣，我就幻想有幾個可能性：
1. “sales” ＋市場調查 —我老婆一定好唔老脾講：「我老公死咗，請你以後唔好打嚟！」點知班友唔識死，隔兩日換人再打過，我相信我老婆會好火上足子彈鬧到佢地狗血淋頭：「你地short㗎！講咗幾多次我老公死咗，你地仲打嚟，你姓乜，我要同你上司講…你地咁鐘意揾我老公，我真係好想我老公今晚嚟揾你，嘿嘿……」其實，我要多謝佢地提供一個俾我老婆發洩的機會，只能夠講佢地唔好彩。
2. 朋友—我相信都會細分兩種：
2.1 我地兩公婆都識嘅話，就應該好客氣講：「陳榆去咗喇！」若你追問：「吓，幾時走㗎？」我諗我老婆都會交待多一D，不過就會越講越喊，因為講電話其實似告解，見唔到個樣會容易流露情緒。
2.2 如果只係我識個D，咁除了好客氣講：「陳榆去咗喇！」你再問，可能佢唔會答你，因為我老婆都怕重複自己。
3. 講道邀請—應該係咁：「對唔住，幫唔到你，佢死咗咯！」
4. 追債—我老婆一定講：「佢死咗，你地去天堂揾佢啦，我乜都唔知！」
不過，以我老婆性格喺我死咗之後應該不時會去旅行散心，咁聽電話的責任應該落到我D仔女同印傭手中：
A. 大仔—佢不嬲簡潔，回覆應該只係：「佢死咗，拜拜！」
B. 二女—佢就抽象少少：「老豆呀，唔知係死咗定瞓咗…」
C. 三女—最過癮：「陳生？有兩個，一個就死咗，一個仲係度，你揾邊個呢？」
D. 印傭—用唔鹹唔淡廣東話：「驅西咗（佢死咗）！」
原來人死真係唔會燈滅，手尾仲會好長…過癮！
原文出自陳榆blog
Labels: Reflection
